Entre chuvascada e chuvascada traballamos no Lab!

Como di o refraneiro…”Dende Santos a Nadal é inverno natural” e nós, como bos horticultores/as , hibernamos no laboratorio pero sen perder de vista a horta, por iso estamos a preparar os sementeiros da nosa futura colleita primaveral.

Entre chuvascos e fortes ventos comezamos os nosos traballos de investigacións no laboratorio do colexio. Os rapaces e rapazas de 3º e 5º de primaria convertéronse en pequenos/as científicos/as nos seus propios traballos experimentais, utilizando de primeira man o método científico. Grazas a el podemos darlle resposta ás preguntas que nos roldan na cachola, convertendo a experimentación  na base do noso coñecemento.

Non vos imos contar o que estamos a investigar, teredes que esperar uns meses para ver os resultados, pero si vos podemos adiantar que como bos hortícolas o noso traballo vai sobre o solo, as plantas e os habitantes deste pequeno ecosistema que é a nosa horta.

Ate o mes que ven compañeiros/as!

5ªEP Realizando os traballos de investigación sobre as plantas e 3ºEP sobre o solo.

Volta ó traballo hortícola

Volvemos un ano máis a horta en compañía! Este ano o lema do noso colexio é a escoita e estamos dispostas a traballar nela escoitando as nosos compañeiros/as e ós nosos cultivos para facer unha gran comunidade hortícola onde podamos aprender uns dos/cos outros/as.

Este primeiro mes dedicámonos, como de costume, a recoller as sementes dos cultivos do curso pasado, recadamos sementes de leituga (a nosa gran aliada) e de cebola. Ademais recollemos algunha pataca e tamén cenorias (un pouco pequenas, pero moi saborosas!).

Tamén recollemos o noso compost, elaborado con moito agarimo polos alumnos/as do ano pasado e ,como non, comezamos a facer a compostaxe que recolleremos o curso que ven, rico en mazás silvestres para darlle o toque da nosa horta.

Volveremos con boas novas! Mentres tanto, seguimos traballando arrincando as malas herbas que aproveitaron o verán para encher os nosos muros de pintorescas tramas de Hedera helix  (Hedra común).

A beleza esplendorosa da nosa horta en primavera.

Boas compañeiros/as,

Seguimos con moitas tarefas dende o horto. Este mes de maio a horta encóntrase en todo o seu esplendor. Xa tivemos a primeira colleita de leitugas que algúns afortunados/as puideron deleitar na súa casa. Pero non soamente temos leitugas, se non que as amorodeiras están cheas!! E en breves poderemos deleitar os primeiros amorodos da primavera. 

Temos xa moitos dos cultivos ben crecidiños; acelgas, porros, trigo, cebolo , fabas… pero tamén creceu dabondo a herba, polo que estes días estivemos moi ocupados cortándoa e arranxando a horta. Aproveitamos para facer mulch, pois  xa que fai bo tempo dispersámolas herbas  polo terreo para facer herba seca e así protexer os nosos cultivos e a terra.

Colocando o mulch (acolchado ou mantillo para protexer os cultivos e o terreo)

Os nenos/as de 3º EP traballaron moito a paciencia neste trimestre, como? Aprendendo a facer titores para as plantas e atándoos  utilizando as propias follas das herbas do horto. O método é infalible! Non é doado pero é posible!

Facendo os titores para as fabas.

Os maiores tamén traballaron moi duro, limpando o noso gran muro de hedras, coidando das nosas árbores e hortalizas e traballando na prevención das pragas e enfermidades, tamén realizando o mantemento dos nosos compostoiros. 

Traballando xuntos tomando decisións no deseño da  horta.

Non hai que esquecer que estamos en mes de transplantes e todos os sementeiros que fixemos no invernos xa están a puntiño, dispostos a meterse baixo terra!

Dende o horto queremos destacar  que o día 25 de Abril foi o día internacional do ADN, celebrámolo no laboratorio facendo unha extracción do ADN de tomate. Foi toda unha experiencia poder velo ao microscopio. Os rapaces puideron observar a nai da diversidade, que non só os humanos temos ADN, se non tamén tódolos seres vivos incluídas as plantas!

Realizando a extracción do ADN de tomate.

Despedímonos ate o mes que ven e esperamos que a horta siga medrando, a este ritmo non nos cabe dúbida!

Vémonos no horto, sempre, en compañía! :)

Proxectos de futuro

Boas a todos/as compañeiros/as!

Non nos esquecemos do blog, aquí estamos de novo para contarvos todo o que estamos a facer no horto.

Estas últimas semanas o frío inverno e as intensas xeadas déronnos unha tregua para comezar a arar o terreo e a preparar e delimitar os nosos bancais para os vindeiros transplantes. Grazas a axuda do alumnado de 6ºEP (que desmontaron uns palés que non se estaban a usar), puidemos construír uns caixóns para delimitar os bancais no horto. Algo tamén sementamos, pero xa volo ensinaremos cando comece a medrar.

Colocando os caixóns

Por outra banda, o alumnado de 3º EP estivo traballando moito na horta, pero tamén tiveron tempo para a investigación científica. Durante os meses de xaneiro e febreiro, os rapaces fixeron un pequeno experimento. Preguntáronse se a música clásica podía influír na xerminación e no desenrolo das plantas.  Vos qué pensades? Xa temos resultados, pero non volos imos dicir aínda, facede este experimento na casa e logo comentamos!!

Preparando os sementeiros para o estudo

Foi un traballo moi rigoroso, no que semanalmente os rapaces anotaban nunha folla unha serie de datos dunha mostra control (sen exposición musical) e da mostra experimenta (a que lle poñían música tódalas semanas). Nestas follas anotaban cando sementaron as plantas, canto tempo tiñan a música posta, cantas plantas xerminaron, cando e que altura tiña cada planta. Todos eses datos analizámolos para chegar a unha conclusión, e se vos animades a facelo na casa esperamos que vos tamén cheguedes a ela.

Medindo a altura das plantas xerminadas

Recollendo os datos obtidos

Foi toda unha experiencia  pois nunca o método científico fora tan divertido de traballar!!

Por outra parte o alumnado de 5ºEP está metido de cheo na construción dun sistema de cultivo hidropónico. Se vos soa a chinés preguntádelle os rapaces, eles xa vos poden explicar que os sistemas de cultivo hidropónico serven para cultivar plantas con auga en vez de terra, xa que aquí os nutrientes se disolven na auga. E para iso están a facer unha estrutura de 3 niveis, con capacidade para 24 plantas. Eles mesmos están tomando as medidas dos tubos de PVC, cortando e montando. Xa temos os tres niveis da estrutura e o esqueleto principal. Agora seguimos en marcha para unir cada un dos niveis e que poda recircular a auga a través do sistema. Toda unha obra de enxeñería  que esperamos poder ensinarvos pronto e posta en marcha!

Cortando os tubos

Montando a estrutura

Polo de agora seguimos traballando!

Iremos informando de boas novas. E xa sabedes…

 Vémonos no horto, sempre, en compañía! J

As cores do outono

Boas Compañeiros/as! 

Xa levamos un tempiño sen pasarnos polo blog. As continuas chuvias as que o inverno compostelán xa nos ten acostumados non nos dan moita tregua para poñer a punto o horto, pero non pasa nada porque así tamén podemos gozar do laboratorio do cole que seguramente botaremos de menos cando saia o sol.

E dado que non para de chover, no laboratorio falamos da importancia da auga. Os nenos e nenas que traballan no horto xa teñen moi claro que a auga é necesaria para o bo crecemento dos nosos cultivos, é fonte de vida pero, na auga hai vida? Isto foi o que comprobaron no laboratorio os rapaces. Eles mesmos prepararon unha mostra de auga doce estanca na que puideron identificar distintas especies microscópicas tanto de orixe animal coma vexetal. Esta experiencia sen dúbida fainos ver a auga con outra perspectiva.

Que puidemos ver?

Táboa Microorganismos. Elaboración propia.

Microinvertebrado de auga doce.

Pero ademais de traballar no estudio da auga tamén traballamos coas cores do outono. Se hai algo que nos chama moito a atención nestas datas son as paisaxes tan fermosas cheas de diversas cores. Cores coma o amarelo, vermello, castaños ou verdes de distintos tons debuxan unha natureza que nos fai soñar. Pero estas cores están sempre nas follas? Quen é o responsable de que as follas cambien de cor?

Para festexar a semana da ciencia en galego fixemos unhas tarxetas coas cales respondemos a estas preguntas que tódolos anos nos facemos. E quedaron ben chulas!

Tarxetas das cores do outono.

As moléculas (pigmentos) son as responsables das  distintas cores que presentan as follas. Todos coñecemos a clorofila pero esta non é a única, hai moitas máis! Elas encárganse de absorber e reflectir a  luz de distinta maneira para así ensinarnos diversas cores.

Cando os días comezan a acurtarse e as follas a caer das árbores, a clorofila marcha! E con ela marchamos nós tamén…pero non vos preocupedes, que volvemos despois do nadal!

Vémonos no horto, en compañía! J

VOLVEMOS A HORTA EN COMPAÑÍA!

Benvidos e benvidas ao novo curso!

Xa estamos de volta cos alumnos e alumnas de 3º e 5º de primaria para poñer a punto, un ano máis, a nosa horta! Temos moitas ideas na cachucha para este novo curso, pero imos ir pasiño a pasiño para convertelas en proxectos de a pé.

Este ano comezamos cunha boa limpeza da horta. Toda a herba acumulámola para facer mulch, unha cobertura natural que empregaremos para protexelo solo dos centos de alertas laranxas ás que o inverno Compostelán nos ten acostumad@s.

Recollendo a herba para o Mulch.

Por certo! Xa recollemos do compostador o abono que fixemos o curso pasado e estamos moi content@s de ver a gran calidade deste compost. Agora podemos dicir que somos todos uns expert@s composteir@s! Esta compostaxe utilizarémola para facer os primeiros sementeiros do ano e tamén para abonar as nosas parcelas.

Apañando o compost deste ano e facendo sementeiros con el.

Outra tarefa do mes de outubro foi a recolecta. Patacas, cenorias, pementos, tomates e fabas foron algunhas das hortalizas que puidemos coller. Pero non só de hortalizas senón tamén de sementes que serán destinadas para as sementeiras deste curso escolar.

Hortalizas e sementes a piques de apañar.

Algunhas das hortalizas usámolas para darlles de comer os nosos vermes xa que, como sabedes, o ano  pasado, xunto cos alumnos de tecnoloxía industrial, construímos uns  vermicomposteiros, e este verán naceu a segunda xeración de vermes. O sustrato que nos deixan estes pequenos animais é incríbel! Moi escuro, cheo de nutrientes e sen olores!!

O noso rico e nutritivo compost!

A pena é que xa chegan as chuvias…pero non pasa nada!  porque temos preparadas actividades  alternativas no laboratorio do colexio. De feito, como estudamos a fotosíntese en ciencias naturais, aproveitamos para ver ao microscopio óptico os estomas, esas pequenas células oclusivas que se encontran nas follas das nosas plantas, que se abren e se cerran para permitilo paso de osíxeno e dióxido de carbono entre o interior e o exterior da planta.  E os pequenos de 3º puideron ver os tricomas das ortigas, eses peliños que nos botan ácido fórmico e nos causa unha sensación moi molesta. Menos mal que coa menta da horta aliviámola ben rápido!

Estomas da planta dun porro.

 Imagen: biologiageotollon.blogspot.com

Tricoma de ortiga.

Imagen: ecoosfera.com

Iremos contando boas novas ó longo do curso! Podedes comentar e darnos ideas. Este blog é de tod@s e para tod@s! 

Aprendendo xunt@s. Contigo, no horto, en Compañía!

COIDANDO DOS NOSOS CULTIVOS

Por fin saíu o sol, e con el nós!

Estivemos a facer moitas cousas no horto, transplantes dos sementeiros, de herbas aromáticas, carteis que identifican os cultivos da horta, pero tamén coidamos o que xa temos! E para protexer aos noso cultivos das pragas, das enfermidades e das carencias nutricionais que podan ter, estivemos elaborando infusións e puríns, algo que resultou moi divertido e onde puidemos participar todos!

Fixemos infusións de allo, moi boas para espantar pragas, e puríns de ortigas, para aportar nutrientes as plantas. As elaboracións saíron moi ben! e tamén o pasamos ben, incluso houbo algún que mentres picaba os allos metía algún na boca! e outros que mentres recollían as ortigas tiveron algún picor, pero nada que non resolvera a menta que temos na horta! Para iso está!

Faremos máis infusións! e botarémolas nas nosas plantas, para que crezan vigorosas e sans!

Transplantando a leituga

Sacando as herbas espontáneas da escarola

Preparando o purín de ortigas

VISITA DAS MESTRAS COMPOSTEIRAS AO COLE

Esta semana visitáronnos as mestras composteiras da deputación de Pontevedra. Elas son as encargadas de manter os composteiros comunitarios que hai en varios dos concellos desta provincia.

As mestras ensináronlle os rapaces cal é o seu traballo, ademais de falar sobre a importancia de reciclar a materia orgánica e crear un novo material como é o abono.

Trouxéronnos unhas mostras de compost en diferentes etapas da súa descomposición e os rapaces puideron observar e clasificar as distintas especies de macroinvertebrados presentes nas mostras. Foi moi divertido!

Ademais tivemos a sorte de que os alumnos de tecnoloxía industrial fixeron uns vermicomposteiros para o noso horto, que son uns compostadores onde os encargados de producir o abono son os vermes. Xa os estreamos!! e estamos dándolle de comer os vermes bebés!

Escoitando as mestras composteiras

Comprobando a temperatura do noso composteiro

Vermicomposteiros feitos polo alumnado de tecnoloxía insdustrial.

OS INSECTOS

Boas a tod@s! 

A agricultura sempre foi da man dos refráns, algúns coma “marzo marzadas, aire frío e sarabiadas”,“vento marzal, bo temporal” ou “febreiro louco e marzo outro pouco” son moi axeitados  á hora de describir o tempo cambiante dun mes tan importante no horto como marzo. Pero aproveitamos ben estes días de chuvia, pois estudamos moitos dos insectos que habitan no noso horto, e tamén sobre outros que non coñeciamos.

Ti sabías que a xoaniña ten o sentido do olfacto nas súas patas? E que move 85 veces por segundo as súas ás?  E sabías que se alimenta, xunto coa crisopa, dos pulgóns que habitan nas árbores froiteiras do horto? Ou que hai un insecto chamado grilo topo que provén do norte de África? Todo isto e moitas cousas máis aprenderon os nosos alumnos durante este mes en horto. Eles mesmos elaboraron uns traballos ben xeitosos sobre os insectos que habitan no horto.  Buscaron información sobre eles, o seu nome científico, como son, de que se alimentan, ou que papel importante desempeñan no noso horto.

Aquí vos deixo algunhas das maquetas que elaboraron os rapaces. Sen dúbida son uns artistas!

Xoaniñas

Mantis relixiosa

Grilo topo

Ouruga

Crisopa

Xoaniña

 

Bolboreta

Revista Hortícolas

Estamos a crear a revista dixital "Hor-TIC-olas", que pretende recoller noutro formato o que acontece ou se leva a cabo no horto escolar e nas áreas implicadas.Neste primeiro nº informa brevemente do proxecto do invernadoiro. A ferramenta empreagada e Madmagz na súa versión gratuita.Espero vos guste e sexa útil para os vosos "quefaceres"


A mag created with Madmagz.