PLANO DO HORTO

Os rapaces teñen moitas ganas de sementar, pero antes temos que coñecer ben onde imos a facelo, temos que coñecer como é o noso horto. 

Esta semana fixemos, mediante grupos, planos do horto. No plano identificamos as parcelas que compoñen o noso horto e tomamos as medidas de largo e ancho daquelas que iamos usar para o cultivo. Despois, cun compás, determinados a orientación das parcelas e determinamos con cores as zonas de mais sombra e as zonas de mais luz. Todo isto será útil para coñecer o lugar mais axeitado para sementar.

Planos do horto

ESTUDANDO O SOLO

Por mor das chuvias (benvidas son) esta semana traballamos no laboratorio coñecendo un pouquiño o solo e a súa importancia. Para isto traballamos co concepto de permeabilidade, observándoa  nas diferentes capas polas que está composto o solo facendo un experimento, pasando auga polos distintos materiais que o conforman e observando o que sucede, e relacionamos o observado coa necesidade da auga para as plantas.

Ademais cos alumnos de 5º de EP observamos distintas estruturas vexetais ó microscopio e tamén á lupa, e observamos a fotosínteses no musgo.

A COLLEITA!

Durante toda a semana os grupos de 3º y 5º de EP. puxéronse a  traballar no horto realizando distintas labores. Recoller a colleita, sacar os antigos cultivos, traballar o terreo, e ademais recolleron material vexetal e montóns das mazás do horto para a preparación da compostaxe deste ano. Todo isto foi levado a cabo mediante grupos de traballo, onde cada un con autonomía propia e tamén co seu equipo de traballo realizaba as tarefas asignadas, sempre baixo supervisión da encargada do horto.

A colleita de fabas e millo

COÑECENDO O NOSO HORTO ESCOLAR

Nesta semana baixamos ó horto para que os rapaces observaran o estado de conservación despois de estar todo o verán sen os coidados necesarios de mantemento, e falamos das tarefas que teriamos que levar a cabo para poñelo en marcha.

Como xogo de apertura para as nosas aulas os alumnos fixeron equipos e dividíronse por parcelas para descubrir as distintas especies arbóreas e os diferentes cultivos que temos no horto para finalizar poñendo en común coa clase todo o identificado.

BENVIDOS!

Ola a todos e benvidos! 

O novo curso escolar xa comezou e con el poñemos en marcha por quinto ano consecutivo o horto do colexio. Este ano os alumnos e alumnas de 3º e 5º de educación primaria dispoñen dunha hora complementaria para a actividade de Horto, pero non soamente se beneficiarán eles das actividades no horto, se non que, como levamos facendo ano tras ano,intentaremos traballar no horto co resto dos cursos da educación primaria. 

A idea é un horto como ferramenta educativa. Un lugar onde facilitar a aprendizaxe de temas ambientais e de aspectos da ciencia en xeral, ademais de traballar a educación ambiental e entender as relacións do ser humano coa natureza.

Iremos contando no blog todo o que acontece no horto e no laboratorio!

Aquí vos deixo unha imaxe de como se encontra o horto nestes momentos. Temos moito traballo por diante.

Saúdos!